Devi Narayaniyam Dasakam - 27
daityaḥ purā kaścana durgamākhyaḥ
prasāditātpadmabhavāttapōbhiḥ |
avaidikaṁ vaidikamapyagr̥hṇā-
-nmantraṁ samastaṁ diviṣajjayaiṣī || 27-1 ||
vēdē gr̥hītē ditijēna viprāḥ
śrutisthirā vismr̥tavēdamantrāḥ |
sāndhyāni karmāṇyapi naiva cakruḥ
kṣitistvavēdādhyayanā babhūva || 27-2 ||
hr̥tēṣu mantrēṣvakhilēṣu pūjā-
-yajñādi bhūmau na kr̥taṁ manuṣyaiḥ |
surā aśaktāstadalābhakhinnā
daityēna yuddhē balinā jitāśca || 27-3 ||
tyaktvā divaṁ tē girigahvarēṣu
nilīya varṣāṇi bahūni ninyuḥ |
vr̥ṣṭērabhāvāddharaṇī ca śuṣka-
-jalāśayā tarṣanipīḍitā:’bhūt || 27-4 ||
sarvē tr̥ṣārtāśca himādrimētya
tvāṁ dhyānapūjānutibhirbhajantaḥ |
prasādayāmāsuranēkakōṭi-
-brahmāṇḍakartrīmakhilārtihantrīm || 27-5 ||
dr̥ṣṭā dayārdrākṣiśatā tvamēbhiḥ
kr̥pāśruvarṣairnavarātramurvyām |
jalāśayānpūrṇajalāṁścakartha
janāḥ śatākṣītyabhidhāṁ dadustē || 27-6 ||
kṣutpīḍitānāṁ ca carācarāṇāṁ
sarvatra nānāvidhamannamiṣṭam |
svādūni mūlāni phalāni cādāḥ
śākambharīti prathitā tatō:’bhūḥ || 27-7 ||
daityastu vijñāya samastamastra-
-śastraiḥ sasainyaḥ praharan vapustē |
raṇāṅgaṇē sāyakaviddhagātraḥ
saśabdamurvyāṁ taruvatpapāta || 27-8 ||
sa cāsurātmā khalu vēdamantrān
ciraṁ paṭhaṁstvāmabhivīkṣamāṇaḥ |
gatāyurāviśya parātmani tva-
-yyavāpa muktiṁ miṣatāṁ surāṇām || 27-9 ||
vēdānhr̥tānabjabhavānanē tvaṁ
punaśca nikṣipya jagatsurakṣām |
kr̥tvā nutā dēvagaṇairnaraiśca
tuṣṭā tirō:’bhūḥ karuṇārdranētrā || 27-10 ||
bhaktasya vai durgatināśinī tvaṁ
sukhapradā durgamahantri mātaḥ |
durgēti nāmnā viditā ca lōkē
vicitrarūpāstava dēvi līlāḥ || 27-11 ||
kō:’pyasti cittē mama durgamō:’yaṁ
jñātastvayā naiva mayā tu dēvi |
yaḥ santataṁ druhyati mē tamāśu
saṁhr̥tya māṁ rakṣa namō namastē || 27-12 ||
